لاہور (وقائع نگار خصوصی) لاہور ہائیکورٹ نے پنجاب اسمبلی میں غیر قانونی تقرریوں سے متعلق کیس میں پی ٹی آئی رہنما اور سابق وزیراعلیٰ پنجاب چودھری پرویزالٰہی کی درخواست ضمانت منظور کر لی۔

منگل کو لاہور ہائیکورٹ کے جسٹس سلطان تنویر احمد نے قبل ازیں محفوظ کیا گیا عدالتی فیصلہ سنایا۔

سابق وزیر اعلیٰ نے بعد از گرفتاری ضمانت کے لیے لاہور ہائیکورٹ سے رجوع کیا تھا۔

اینٹی کرپشن اسٹیبلشمنٹ (ACE) نے مقدمہ درج کیا تھا اور پرویز کو 25 اکتوبر 2023 کو گرفتار کیا تھا۔

الٰہی کو یکم جون سے متعدد مقدمات میں متعدد بار گرفتار کیا جا چکا ہے، جن میں تازہ ترین 18 ستمبر کو پنجاب اے سی ای نے کی تھی۔

اے سی ای کے ترجمان کی جانب سے فراہم کردہ تفصیلات کے مطابق الٰہی نے پنجاب اسمبلی میں گریڈ 17 کی 12 آسامیوں پر غیر قانونی بھرتیاں کیں۔

ریکارڈ میں ردوبدل کرکے امیدواروں کو صوبائی اسمبلی میں بھرتی کیا گیا۔